ಆಫೀಸ್‌ಗೆ ಕಡ್ಡಾಯವಾಗಿ ಹಾಜರಾಗಬೇಕು ಎಂಬ ಹೊಸ ನೀತಿಯನ್ನು ಜಾರಿಗೆ ತಂದಿದ್ದ ಐಟಿ ಕಂಪನಿಯ ನಿರ್ಧಾರ ಇದೀಗ ದೊಡ್ಡ ವಿವಾದಕ್ಕೆ ಕಾರಣವಾಗಿದೆ. ಕಳೆದ ಹಲವು ತಿಂಗಳಿಂದ ವರ್ಕ್ ಫ್ರಮ್ ಹೋಮ್‌ ಮೂಲಕ ಕೆಲಸ ನಿರ್ವಹಿಸುತ್ತಿದ್ದ ಉದ್ಯೋಗಿಗಳು, ಈ ಇದ್ದಕ್ಕಿದ್ದಂತೆ ಬಂದ ಆದೇಶದಿಂದ ಅಸಮಾಧಾನಗೊಂಡಿದ್ದರು. ಕಂಪನಿ ಮ್ಯಾನೇಜ್‌ಮೆಂಟ್ ಎಲ್ಲ ಉದ್ಯೋಗಿಗಳು ವಾರದಲ್ಲಿ ಐದು ದಿನ ಆಫೀಸ್‌ನಲ್ಲಿ ಹಾಜರಾಗಬೇಕು ಎಂದು ಪ್ರಕಟಿಸಿದ ಕೆಲವೇ ಗಂಟೆಗಳಲ್ಲೇ, ಸುಮಾರು 600 ಮಂದಿ ಉದ್ಯೋಗಿಗಳು ಒಟ್ಟುಗೂಡಿ ರಾಜೀನಾಮೆ ಸಲ್ಲಿಸಿರುವ ಮಾಹಿತಿ ಹೊರಬಂದಿದೆ.
ಉದ್ಯೋಗಿಗಳು ಈ ನಿರ್ಧಾರವನ್ನು ತೀವ್ರ ಆಕ್ಷೇಪಿಸಿದ್ದು, ಮನೆಯ ಜವಾಬ್ದಾರಿಗಳು, ಪ್ರಯಾಣದ ದೂರ, ವೆಚ್ಚ ಆರೋಗ್ಯ ಕಾರಣಗಳಿಂದ ಹೈಬ್ರಿಡ್ ಅಥವಾ WFH ಆಯ್ಕೆ ಮುಂದುವರಿಸಬೇಕು ಎಂದು ಆಗ್ರಹಿಸಿದ್ದರು. ಆದರೆ ಸಂಸ್ಥೆ ತನ್ನ ನೀತಿಯನ್ನು ಬದಲಿಸಲು ಸಮ್ಮತಿಸದೆ ಇರುವುದರಿಂದ, ರಾಜೀನಾಮೆ ಒಂದು ಸಾಮೂಹಿಕ ಪ್ರತಿಭಟನೆ ರೂಪ ಪಡೆದಿದೆ. ಈಗ ಈ ಘಟನೆ ಐಟಿ ಕ್ಷೇತ್ರದಲ್ಲಿ “WFH ವಿರುದ್ಧ WFO” ಚರ್ಚೆಗೆ ಮತ್ತೊಮ್ಮೆ ಚೈತನ್ಯ ತುಂಬಿದ್ದು, ಇತರ ಕಂಪನಿಗಳೂ ತಮ್ಮ ನೀತಿಗಳ ಬಗ್ಗೆ ಮರುಚಿಂತನೆ ನಡೆಸುವ ಪರಿಸ್ಥಿತಿ ಉಂಟಾಗಿದೆ.ವಾರಕ್ಕೆ ಇನ್ನು ಮುಂದೆ ಐದು ದಿನ ಕಡ್ಡಾಯವಾಗಿ ಕಚೇರಿಗೆ ಬರಲೇ ಬೇಕು ಎನ್ನುವ ಸಂಸ್ಥೆಯೊಂದರ ನಿರ್ಧಾರಕ್ಕೆ ನೌಕರರು ತಿರುಗಿ ಬಿದಿದ್ದಾರೆ. ಸುಮಾರು ಆರು ನೂರಕ್ಕೂ ಹೆಚ್ಚು ಉದ್ಯೋಗಿಗಳು ನಿಮ್ಮ ಕೆಲಸವೇ ಬೇಡ ಎಂದು ರಾಜೀನಾಮೆ ನೀಡಿದ್ದಾರೆ. ಇದು, ಕಂಪೆನಿಗೆ ಮಿಲಿಯನ್ ಡಾಲರ್ ಲೆಕ್ಕದಲ್ಲಿ ನಷ್ಟವನ್ನುಂಟು ಮಾಡಿದೆ.
ವರ್ಕ್ ಫ್ರಂ ಹೋಂ ಹಾಗೂ ಹೈಬ್ರಿಡ್ ಪದ್ಧತಿಗೆ ಮೂರು ವರ್ಷಗಳಿಂದ ಹೊಂದಿಕೊಂಡಿದ್ದ ಉದ್ಯೋಗಿಗಳು ಆಕಸ್ಮಿಕವಾಗಿ ದೊಡ್ಡ ಶಾಕ್ ಅನುಭವಿಸಬೇಕಾಯ್ತು. ಅಮೆರಿಕಾದ ಲಾಸ್ ಏಂಜಲೀಸ್ ಮತ್ತು ನ್ಯೂಯಾರ್ಕ್ ನಗರಗಳಲ್ಲಿ ಕಚೇರಿಗಳನ್ನು ಹೊಂದಿರುವ ಪ್ಯಾರಾಮೌಂಟ್–ಸ್ಕೈಡಾನ್ಸ್ ಸಂಸ್ಥೆ, ವಾರಕ್ಕೆ ಐದು ದಿನ ಕಚೇರಿಯಿಂದಲೇ ಕೆಲಸ ಮಾಡಬೇಕು ಎಂದು ಹೊಸ ನಿಯಮ ಜಾರಿಗೊಳಿಸಿದಾಗ, ನೂರಾರು ಮಂದಿ ಇದನ್ನು ವಿರೋಧಿಸಿದರು. ಸಂಸ್ಥೆಯ ಮಾನವ ಸಂಪನ್ಮೂಲ ವಿಭಾಗದಿಂದ ಬಂದ “ಮುಂದಿನಿಂದ ಕಡ್ಡಾಯ WFO” ಇಮೇಲ್, ಉದ್ಯೋಗಿಗಳಲ್ಲಿ ಭಾರೀ ಅಸಮಾಧಾನ ಮೂಡಿಸಿತು. ಇದರಿಂದ ಆಕ್ರೋಶಗೊಂಡ ಸುಮಾರು ಆರು ನೂರಕ್ಕೂ ಹೆಚ್ಚು ಉದ್ಯೋಗಿಗಳು ಏಕಕಾಲದಲ್ಲಿ ರಾಜೀನಾಮೆ ಸಲ್ಲಿಸುವ ನಿರ್ಧಾರ ತೆಗೆದುಕೊಂಡರು.
ಈ ಸಮೂಹ ರಾಜೀನಾಮೆಯಿಂದ ಸಂಸ್ಥೆಗೆ ಸುಮಾರು 185 ಮಿಲಿಯನ್ ಡಾಲರ್‌ಗಳಷ್ಟು ಆರ್ಥಿಕ ನಷ್ಟ ಸಂಭವಿಸಿದಂತೆ ವರದಿಯಾಗಿದೆ. ಕೋವಿಡ್ ನಂತರದಿಂದ ಮುಂದುವರಿಸುತ್ತಿದ್ದ WFH ಸೌಲಭ್ಯವನ್ನು ಇತ್ತೀಚಿನವರೆಗೂ ಸಂಸ್ಥೆ ನೀಡುತ್ತಿದ್ದರೂ, ಪ್ರೊಡಕ್ಟಿವಿಟಿ ಕುಸಿತ, ತಂಡಗಳ ನಡುವೆ ಸಮನ್ವಯದ ಕೊರತೆ, ಮತ್ತು ಹೊಸ ವಿಲೀನದ ನಂತರ ಕಾರ್ಯನಿರ್ವಹಣಾ ಒತ್ತಡ ಹೆಚ್ಚಿದ ಕಾರಣ, ಸಂಸ್ಥೆಯ CEO ಡೇವಿಡ್ ಎಲಿಸನ್ ಈ ಹೊಸ ನಿಯಮ ಘೋಷಿಸಿದರು. ಉದ್ಯೋಗಿಗಳಿಗೆ ಎರಡು ತಿಂಗಳು ಮುಂಚಿತವಾಗಿಯೇ “WFH ರದ್ದು” ಮಾಹಿತಿ ನೀಡಿದ್ದರೂ, ಹೆಚ್ಚಿನವರು ಇದಕ್ಕೆ ಅಸಮಾಧಾನ ವ್ಯಕ್ತಪಡಿಸಿ ಹೊರಟಿದ್ದಾರೆ.
ವಿಲೀನಗೊಂಡ ನಂತರ, ಕಂಪನಿಯ ಒಟ್ಟು ಸಿಬ್ಬಂದಿಯಲ್ಲಿ ಸುಮಾರು 1,600 ಮಂದಿ ಹೆಚ್ಚುವರಿ ಉದ್ಯೋಗಿಗಳು ಇದ್ದರು. ಸಂಸ್ಥೆ ರಿಸ್ಟ್ರಕ್ಚರಿಂಗ್ ಪ್ರಕ್ರಿಯೆಯ ಭಾಗವಾಗಿ ಕೆಲವು ಹುದ್ದೆಗಳನ್ನು ಕಡಿತಗೊಳಿಸಬೇಕಾಗಿತ್ತು. WFO ನಿಯಮ ಜಾರಿಗೊಳಿಸುವುದು ಅದರ ಒಂದು ಭಾಗವಾಗಿತ್ತು ಎಂಬ ಮಾತು ಉದ್ಯೋಗಿಗಳಲ್ಲಿ ಕೇಳಿಬಂದಿದೆ. ಕಂಪನಿ ಕೂಡಾ ಇದನ್ನು ಪರೋಕ್ಷವಾಗಿ ಸಮರ್ಥಿಸಿಕೊಂಡಿದ್ದು, ಮುಂದಿನ ವರ್ಷದ ಆರಂಭದಲ್ಲಿ ಸಂಸ್ಥೆಯ ಕಾರ್ಯಚಟುವಟಿಕೆಗೆ ಅಗತ್ಯವಿಲ್ಲದ ಆಸ್ತಿಗಳನ್ನು ಮಾರಾಟ ಮಾಡುವುದಾಗಿ ಹೇಳಿದೆ.
ಕಂಪನಿ ಹೇಳುವಂತೆ, ಕಚೇರಿಯಲ್ಲಿ ನೇರ ಸಂವಹನ ಮತ್ತು ತಂಡಗಳ ನಡುವೆ ಹತ್ತಿರದ ಸಹಕಾರ ಯಾವುದೇ ಸಂಸ್ಥೆಯ ಬೆಳವಣಿಗೆಗೆ ಅಗತ್ಯ. ರಿಮೋಟ್ ವರ್ಕ್ ಸಾಧ್ಯತೆಗಳನ್ನು ಸಂಪೂರ್ಣವಾಗಿ ನಿರಾಕರಿಸದೇ ಇದ್ದರೂ, ದೊಡ್ಡ ಪ್ರಮಾಣದ ಸಹಕರಣೆ ಬೇಕಾದ ಯೋಜನೆಗಳಿಗೆ ಕಚೇರಿಯ ಹಾಜರಾತಿ ಕಡ್ಡಾಯವಾಗಿದೆ ಎಂದೂ ಕಂಪನಿ ಸ್ಪಷ್ಟಪಡಿಸಿದೆ. ಆದರೆ ಉದ್ಯೋಗಿಗಳು, ದೂರ ಪ್ರಯಾಣ, ಕುಟುಂಬ ಜವಾಬ್ದಾರಿಗಳು, ಖರ್ಚಿನ ಹೆಚ್ಚಳ ಮೊದಲಾದ ಕಾರಣಗಳಿಂದ ಹೈಬ್ರಿಡ್ ಅಥವಾ WFH ಮುಂದುವರಿಸಿದರೆ ಉತ್ತಮ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಈ ಅಭಿಪ್ರಾಯ ವ್ಯತ್ಯಾಸವೇ ದೊಡ್ಡ ಮಟ್ಟದ ರಾಜೀನಾಮೆಗೆ ಕಾರಣವಾದಂತೆ ಕಾಣುತ್ತದೆ.
ಈ ಘಟನೆ ಈಗ ಐಟಿ ಮತ್ತು ಮೀಡಿಯಾ ಉದ್ಯಮದಲ್ಲಿ “WFH vs WFO” ಚರ್ಚೆಗೆ ಮತ್ತೆ ಬೆಂಕಿ ಹಚ್ಚಿದೆ. ಅನೇಕ ಕಂಪನಿಗಳು ತಮ್ಮ ಉದ್ಯೋಗ ನೀತಿಗಳನ್ನು ಇದೀಗ ಮರುಪರಿಶೀಲಿಸುತ್ತಿದ್ದು, ಉದ್ಯೋಗಿಗಳ ಬೇಡಿಕೆ ಮತ್ತು ಕಂಪನಿ ಹಿತಗಳ ನಡುವಿನ ಸಮತೋಲನ ಸಾಧಿಸುವುದು ಮುಂದಿನ ದೊಡ್ಡ ಸವಾಲು ಎನ್ನುವುದು ಸ್ಪಷ್ಟವಾಗಿದೆ.
